CA2005 :: adrässe :: brichtli :: textli :: föteli
Uf dere Site schribi wies mir so gange isch, was sich eis nachem andere tue hät. Im Gägesatz zu dene Brichtli sind d'Textli i de MK-CA-Wiki stichwortartig ufbaut, churzi Bemerkige zu verschidenschte Theme.
...
(auguscht)
...
(mitti mai - endi juli)
...
(mitti april - mitti mai)
Bsuech us de Schwiz, demit verbundene erfolgriche Abschluss vom Näbeprojekt, und es paar Usflüg i de Umgäbig. Han au erschti Erfolg bim Hauptprojekt, chan langsam öpis zeige.
Fahre en Hufe Velo, tuen defür nöd gross andersch Outdöörle, isch tiptop so, chani dänn wider dehei mache womer nöd immer so wit mues chärele bis zumene Berg. Gang mitem Dane und em Kent a d'Sea Otter Classic, fahre s'erscht Mal mit Klick-In Pedal und fahre mis erschte Ränne mit mim nigelnagelneue Mountain-Bike. S'Training gaht grad witer, schliessli staht s'24h Ränne vor de Türe. 24h Rundi um Rundi imene 5-er Team, es super Erläbnis, nudelfertig am Sunntig-Abig :-)
I de WG lauft au öpis, am Stefan sini Eltere chömed uf Bsuech, de Stefan seit Tschüss, de Martin zieht ih. Mached en Wucheend-Usflug in Yosemite Nationalpark wo dur d'Schneeschmelzi alli Wasserfäll es herrlichs Spektakel bütet.
(mitti märz - mitti april)
Dur's Tischtennis spile und Velo fahre findi immer besser de Draht zu de Lüt. Gang jetzt au regelmässig mit es paarne go Zmittag ässe und gnüsse di international Chuchi, vietnamesisch, japanisch, chinesisch, thailändisch, mexikanisch. Han dur es Näbeprojekt au ab und zue es Telefon uf Grifesee, tuet risig guet :-)
Am 19. März isch endlich mini Social Security Charte da. Am 22. Theorieprüefig, am 23. Fahrprüefig, am 26. es Auto, so gaht's. D'Alice und ich mached üs us de Not e Tugend und fahred jetzt abwächsligswis zäme, und gnüssed Gspröch über d'Mänsche und d'Wält.
Fange mitem Mulörgeli-Kurs ah, en glatte Lehrer, bärtig, chugelrund, immer gueti Luune.
(mitti februar - mitti märz)
Bin offiziell immer nonig igreist, also no kei Social Security, drum au no kei Autoversicherig. Wili kei Luscht han en Tuusiger für es Mietauto usgeh, heisst's jetzt mal en Monet lang Bike & BART. Mitem Velo abe uf d'BART-Station, amene Glanztag liecht kriminell under 5 min ;-), 30 min mitem Bähnli Richtig Südoschte, dänn 10 min mitem Velo zur Rainin. Dummerwis rägnet's zum Teil tagelang, Rägeschutz und Rägehose sind agseit, chume glich es paar mal bachnass dehei ah am Abig. Zum Glück chani ab und zue mit de Alice mitfahre, so chani wenigschtens chli rede und mues nöme vom BART zu de Rainin per Velo.
De Tag dure sitze tagelang vorem Computer ohni würkli es Wort z'rede. Weni chönnt würdi jede Tag de Flüger neh und hei gah. Bin risig froh dasi inere WG wohne und am Abig amigs chli mit de Lüt da chan rede. Und vil i d'Schwiz telefoniere...
Zum Glück git's einzelni Liechtblick. Lerne de Andrzej känne, en Amerikaner mit polnische Wurzle, ufgwachse in Genf. Und de Matthias, en Dütsche, gang mitem einisch go chlättere und go Schi fahre. Fang ah zweimal pro Wuche mitem Dane, em Kent und em Jim über de Mittag go Velo fahre und spile öpe mitem Mike Tischtennis.
Di erschte Täg isch's witer gange wie ufem Flug, ufe und abe. Han zerscht imene Business-Apartment gwohnt, eigentlich inere zweiehalb Zimmerwohnig. Tiptop igrichtet und schön, aber ordeli einsam. Han dänn zum Glück e WG gfunde, isch simpel da in Berkeley, wohne jetzt deht mit drü Berkeley Lüt (dütsche Wirtschaft-Informatiker, amerikanische Mathematiker, italienische Physiker post doc) binere ältere dütsche Fotografin. Mobile und Bank-Konto isch au kei Hexerei gsi, ussert dassmer bi de einte Mobile-Provider kei SMS uf Europa chan schicke, aber isch keis Problem zum Zügs in Lade zrugg geh. Da in Berkeley wüssed alli, dassmer als Neuling z'erscht kei Social Security Card hät. Uf die mueser nämli es Wili warte, wäge de Homeland Security Paranoia gaht alles laaaaang. Ohni Social Security Card kein kalifornische Fahruswis, somit au kei Versicherig und keis eiges Auto...
Telefoniere isch spot-billig, übers Internet mit Skype choschtet mich e Minute ufe Schwizer Feschtnetz-Nummere grad mal 3 Rappe, miteme Telefon mitere Prepaid-Charte 6 Rappe. Und Skype und en Messenger kombiniert miteme Headset und ere Webcam git es tiptops Internet-Video-Telefon wo erscht no gratis isch :-)
Schaffe jetzt sitem 24. bi de Rainin, so far so good. Han verschideni Projektli, mal luege was alles drus wird. S'Arbetsklima isch sehr locker, Kalifornie halt, glich ischmer einiges fremd und ungwohnt.
Zügs organisiere isch mir bis jetzt also ordeli eifach gfalle, s'Tschüss säge und s'Wäggah vo de Schwiz isch de Horror gsi, de Flug und di erschte Täg allei im Apartment genauso. Tönt jetzt vilicht wieni's mittlerwile im Griff hett, isch aber gar nöd so. Es git en Hufe interessanti Moment, vil Neus zum entdecke und gnüsse, glichzitig einigi Tüfpünkt, ghört wohl dezue.
2003-02-20 :: Video Konferenz mit de Rainin, Beginn vo de Zämearbet
2004-06-21 :: Präsentation vom Projekt am Ken Rainin
2004-09-02..03 :: Bsuech bi de Rainin und 2 Täg lang Präsentatione
2004-09-17 :: Han definitiv en Job in Kalifornie :-)
2004-10-18 :: Visa-Atrag
2004-11-18 :: Visa vorprüeft dur AIPT
2004-12-03 :: Party i de WG33
2004-12-08 :: Visa bewilliget dur d'US-Botschaft Bern
2004-12-10 :: Bichume Visa per Poscht
2005-01-13 :: Reis nach Oakland
2005-01-22 :: Zügle nach Berkeley
2005-01-24 :: Erschte Arbetstag
matthias ätt jorj pönk ch :: 2006-03-06